Góð stemning var í Víðidal í gærkvöldi þar sem að fjöldi manns fylgdist með ræktunarbúsýningum á Landsmóti hestamanna. Viðburðurinn er einn af hápunktum landsmótshelgarinnar en þá sýna hrossaræktunarbú afrakstur ræktunar sinnar og bjóða upp á sýningu fyrir áhorfendur.
Að sýningum loknum tók skemmtidagskrá við fram eftir nóttu, þ.á m. kántrítónleikar í reiðhöllinni og stórdansleikur með fastagestunum Helga Björns og Reiðmönnum vindanna.
Fyrr í kvöld fóru fram úrslit í 250 m skeiði þar sem að gríðarlega góðir tímar náðust og heimsmetið líklegast bætt nokkrum sinnum. Nýjasta heimsmetinu náðu þeir Konráð Valur Sveinsson og Kjarkur frá Árbæjarhjáleigu II, tími þeirra var 21,15. Í 150 m skeiðinu fór hraðast Árni Björn Pálsson á Korku frá Steinnesi á 13,89 sek.
Ljósmyndari Mbl.is var á staðnum og fangaði nokkur augnablik.