Sænska karlalandsliðið í handbolta varð fyrir miklu áfalli í dag er í ljós kom að Jim Gottfridsson, einn allra besti leikmaður liðsins, leikur ekki meira með á HM vegna meiðsla.
Gottfridsson fór snemma af velli í sigri sænska liðsins á því egypska í Stokkhólmi í gærkvöldi. Eftir frekari skoðun er ljóst að leikstjórnandinn er handarbrotinn og verður ekki meira með.
Verður hann frá keppni í allt að tvo og hálfan mánuð og er því ljóst að hann muni einnig missa af leikjum með þýska liðinu Flensburg eftir að heimsmeistaramótinu lýkur.
Svíþjóð vann 26:22-sigur á Egyptalandi í gærkvöldi og mætir Frakklandi í undanúrslitum á morgun.