Skautafélag Akureyrar vann risasigur, 6:1, í öðrum leik sínum í undanriðli Evrópubikar félagsliða í íshokkí. Riðillinn er leikinn í Búlgaríu og í dag var það tyrkneska meistaraliðið Zeytinburnu frá Istanbúl sem lenti í Víkingunum að norðan.
Sigmundur Sveinsson kom SA yfir og Ingvar Þór Jónsson bætti við marki í fyrsta leikhluta. Thomas Stuart-Dant kom SA í 3:0 áður en Tyrkirnir minnkuðu muninn. Jón Benedikt Gíslason og Jóhann Már Leifsson komu SA hins vegar í 5:1 áður en annar leikhluti var úti. Bjartur Gunnarsson innsiglaði svo 6:1 sigur SA þegar skammt var eftir.
SA vann búlgarska meistaraliðið Irbis-Skate 5:4 eftir vítakeppni í gær og er nú með fimm stig á toppi riðilsins. Á morgun mætir SA ísraleska liðinu Bat Yam, sem tapaði 8:1 fyrir búlgarska liðinu í dag. Aðeins efsta liðið kemst áfram í næstu umferð og stendur SA því vel að vígi með 5 stig, Irbis-Skate hefur 4, Zeytinburnu er með 3 stig og Bat Yam er án stiga.
SA er í sinni fyrstu Evrópukeppni en UMFK Esja lék í sömu keppni fyrir ári og hafði þá eitt stig upp úr sínum þremur leikjum. Komist SA áfram í næstu umferð, sem fram fer í Riga í október, verður því um sögulega stund að ræða í íslensku íshokkíi.