„Ákvað að gera þetta fyrir mig“

Jón Arnór Stefánsson, sem í dag gekk í raðir Vals, segist hafa gefið sér góðan tíma til að ákveða hvort hann myndi halda áfram í körfuboltanum eða ekki. Löngunin til að spila hafi kviknað í sumar og ætlar hann að njóta þess að spila næsta vetur. 

Frétt af mbl.is

Jón Arnór kynntur til leiks hjá Val

„Nú er orðið ansi langt síðan síðasta tímabili lauk. Ég gaf mér fyrst og fremst góðan tíma til að ákveða hvort ég ætlaði að halda áfram að spila eða ekki. Það var fyrsta ákvörðunin sem ég þurfti að taka. Ef ég hefði látið staðar numið hefði ég ekki aldrei fengið að upplifa aftur að keppa í íþróttinni. Ég fann smám saman að ég var ekki tilbúinn til þess. Mig langar að halda áfram,“ sagði Jón Arnór þegar mbl.is ræddi við hann á blaðamannafundi á Hlíðarenda í dag en Jón hefur aldrei á sínum ferli lýst því yfir að hann sé hættur. Hann gaf hins vegar sterklega í skyn í vor að sú staða gæti komið upp í ár en hafði ekki tekið endanlega ákvörðun. 

Passar ekki endilega inn í kynslóðaskiptin í KR

Jón hefur hingað til ekki leikið fyrir annað félag í meistaraflokki hérlendis en KR en hann sleit barnsskónum í Fram. Hann er hins vegar með sterkar tengingar við lykilmenn í Val. Vinur hans Pavel Ermolinskij er leikmaður liðsins og Finnur Freyr Stefánsson, fyrrverandi þjálfari KR, tók við Valsliðinu í sumar. 

„Ég byrjaði á því að taka skotæfingar með Pavel í Valsheimilinu og tók einhverjar æfingar með honum. Þá fann ég að mig langaði hrikalega að byrja aftur að æfa og vera með. Miklar breytingar hafa átt sér stað hjá KR. Ingi [Þór Steinþórsson] var rekinn og þar tóku KR-ingar rosalega erfiða ákvörðun. Þeir réðu Darra [Frey Atlason] sem er ferskur og á eftir að verða flottur. En þar er ungur kjarni og allt í góðu með það en ég held að það sé ekki fyrir mig. Það er mín tilfinning.

Finnur Freyr Stefánsson og Jón Arnór Stefánsson hafa fært sig úr Vesturbænum í Hlíðarnar. Þeir standa frammi fyrir nýrri áskorun en ár og dagar eru síðan karlalið Vals í körfuknattleik hefur verið í toppbaráttunni á Íslandsmótinu. mbl.is/Árni Sæberg

Ég er búinn að vera lengi í KR. Ef ég væri áfram á sama stað þá veit ég ekki hvort hungrið í að spila væri jafn mikið. Þessi breyting gerir það kannski að verkum að ég er enn hungraður í að spila. Ég er ekki viss um að ég passi inn í kynslóðaskiptin hjá KR. Það er bara mín tilfinning en mér finnst flott að aðrir menn séu að taka við KR-liðinu. Nú langaði mig í einhverja breytingu og eitthvert krydd. Ég er vanur því að skipta um félög erlendis en hef ekki gert það fyrr hér innanlands. Kannski finnst mönnum það vera galin hugmynd en ég hugsa að þetta sé það besta fyrir mig í stöðunni. Ég verð alla vega á vellinum að spila og ég held að það sé jákvætt að ég sé ekki hættur.“  

Veit að ég verð velkominn í Frostaskjólið

Jón Arnór segir ennfremur að hann hafi velt því fyrir sér hvernig umræðan yrði varðandi það að fara úr KR í Val en rígurinn á milli félaganna ætti að vera íþróttaunnendum vel kunnur. 

„Þetta var erfið ákvörðun. Ég viðurkenni það alveg. Aðallega af því að maður er hræddur við umræðuna. Hvað mun fólk segja? En allt í einu varð ég sáttur við það og ákvað að gera þetta fyrir mig í stað þess að gera eitthvað sem aðrir ætlast til af mér,“ útskýrði Jón Arnór.

Í framhaldi af þessum vangaveltum gerir blaðamaður tilraun til að vera fyndinn og spyr hvort Jón muni geta farið óáreittur í Melabúðina. Jón brosir. „Jájá, ég hef engar áhyggjur af því. Ég fer frá KR í góðu. Ég veit að ég verð velkominn í Frostaskjólið. Guttinn minn er nú að æfa þar þannig að ég mun sækja hann á æfingar og svona. Ég elska mitt fólk í KR og verð alltaf KR-ingur. Á sama tíma finn ég fyrir tilhlökkun að taka þátt í einhverju nýju. Nýtt umhverfi og mun kynnast nýju fólki. Fram undan er ný áskorun,“ sagði Jón Arnór Stefánsson ennfremur í samtali við mbl.is.

• Blogga um frétt