Landsliðsmennirnir Tryggvi Snær Hlinason og Martin Hermannsson fögnuðu góðum sigrum með liðum sínum í spænsku A-deildinni í körfuknattleik í kvöld.
Tryggvi var í stóru hlutverki hjá Zaragoza sem vann Gran Canaria örugglega á heimavelli, 88:71. Hann var þriðji stigahæsti leikmðaur liðsins með 16 stig, tók sex fráköst og átti eina stoðsendingu en hann spilaði í tæpar 30 mínútur af 40.
Martin spilaði í tæpar 14 mínútur með Valencia sem vann Manresa á útivelli, 82:74. Hann skoraði 7 stig, átti þrjár stoðsendingar og tók tvö fráköst.
Þetta var fyrsti sigur Zaragoza sem hafði tapað tveimur fyrstu leikjum sínum í deildinni en Valencia vann sinn annan leik af þremur.
Real Madrid, Obradorio, Barcelona, Baskonia og Tenerife eru öll með fullt hús stiga eftir þrjár fyrstu umferðirnar.