Á morgun laugardaginn 25. janúar fer fram önnur af tveimur hjólakeppnum Reykjavíkurleikanna, Enduro-fjallahjólakeppni. Þetta er í fyrsta sinn sem keppt er í Enduro á leikunum. Ræst verður af stað frá bílastæðinu við Perluna klukkan 17:00 og búist við að keppni standi yfir til klukkan 19.
Hjólaðar verða 4-5 leiðir og keppast þátttakendur um að vera sem fljótastir með þær, samanlagður tími ræður úrslitum. Hvort hjólaleiðirnar verða 4 eða 5 fer eftir því hvernig aðstæður verða á morgun.
Keppendur munu hjóla með ljóskastara og telja skipuleggjendur að búast megi við miklu sjónarspili. Áhorfendur eru einnig hvattir til að mæta með ljós því keppnin fer fram að miklu leyti í myrkri. Áhugafólk um fjallahjólreiðar ættu ekki að láta þennan skemmtilega viðburð fram hjá sér fara.