Athugunarmerking hefur verið sett á hlutabréf Eimskipafélags Íslands vegna rannsóknar Samkeppniseftirlitsins á ólögmætu samráði félagsins og Samskipa og hugsanlegri misnotkun á markaðsráðandi stöðu.
Í tilkynningu frá Kauphöllinni er vísað til tilkynningar Eimskips í gær þar sem ásökunum um samráð var hafnað auk tilkynningar Samkeppniseftirlitsins þar sem staðfest er að rannsóknin standi yfir.
Er þetta gert á grundvelli ákvæðis í reglum fyrir útgefendur fjármálagerninga á NASDAQ OMX Iceland þar sem segir að bréf skuli sett á athugunarlista ef fyrir hendi eru aðstæður sem leiða af sér umtalsverða óvissu varðandi félagið eða verðmyndun verðbréfanna
Í reglunum segir að markmiðið með athugunarlistanum sé að gefa merki til markaðarins um að sérstakar aðstæður séu hjá félaginu eða hlutabréfum þess sem fjárfestar ættu að gefa gaum.
Samkeppniseftirlitið hefur kært ellefu manns til embættis Sérstaks saksóknara vegna gruns um að félögin hafi um árabil haft með sér ólöglegt samráð. Á meðal þeirra eru Gylfi Sigfússon, forstjóri Eimskips, og Ásbjörn Gíslason, fyrrverandi forstjóri Samskipa, sem nú stýrir Samskip Logistic í Hollandi og Pálmar Óli Magnússon, núverandi forstjóri Samskipa.