Ghosn rekinn frá Nissan

Stjórn japanska bílaframleiðandans Nissan hefur rekið Carlos Ghosn úr embætti stjórnarformanns en hann var handtekinn fyrr í vikunni grunaður um fjársvik í starfi. Ghosn, sem er 64 ára gamall, hefur stýrt Nissan í tæpa tvo áratugi.

Ghosn er sakaður um að hafa ekki gefið réttar upplýsingar um laun sín auk annarrar fjármálaóreiðu í starfi. Innri endurskoðun Nissan hafði rannsakað mál stjórnarformannsins í nokkrar vikur eftir að uppljóstrari hafði samband við stjórnendur fyrirtækisins og veitti upplýsingar um fjármál Ghosn.

Frétt af mbl.is

Bílaheimurinn leikur á reiðiskjálfi

Málið getur haft víðtæk áhrif á bílaiðnaðinn og er allt á huldu um framhald samstarfs þriggja bílaframleiðenda, Nissan, Renault og Misubishi Motors. Samanlagt seldu þau 10,6 milljónir bifreiða í fyrra sem er meira en nokkurt annað fyrirtæki.

Ghosn var hugmyndasmiðurinn á bak við bandalagið og límið sem hélt því saman, segir í fréttum japanskra fjölmiðla. 

Saksóknarar létu handtaka Ghosn þegar hann lenti á einkaþotu í Tókýó á mánudag. Er hann sakaður um að hafa vantalið laun sín um 44 milljónir Bandaríkjadala á tímabilinu júní 2011 til júní 2015. Ghosn er haldið í Tókýó og hefur ekkert heyrst frá honum síðan hann var handtekinn. 

• Blogga um frétt