Skuldir ríkissjóðs munu áfram lækka, en þó hægar en upphaflega var gert ráð fyrir, samkvæmt breyttri fjármálaáætlun sem lögð var fram á alþingi í dag. Í stað þess að hlutfallið fari niður í 20,9% árið 2022 er nú gert ráð fyrir að það verði 22,4% enda verði afgangur að rekstri ríkissjóðs minni en áður var lagt upp með.
Ríkissjóður verður rekinn nálægt núlli næstu tvö ár, í stað 30 milljarða árlegs afgangs. Tekjur ríkisins verða samkvæmt tillögunni 25 milljörðum króna lægri en áður var gert ráð fyrir, og helst svo hvert ár svo langt sem áætlunin nær. Sömuleiðis er gert ráð fyrir að útgjöld ríkisins aukist um níu milljarða á næsta ári samanborið við fyrri áætlun og skýrist það af 11 milljarða hækkun í atvinnuleysistryggingasjóð og ábyrgðasjóð launa, sem viðbúið er að meira muni mæða á. Árin 2022-2024 á heildarafkoma ríkisins þó að vera jákvæð um 11, 11 og 14 milljarða.
Farið er í ýmsar aðgerðir til að ná endum saman og ekki eru allar þeirra hreinar aðhaldsaðgerðir. Þannig er hlutdeild HHÍ í byggingu húss íslenskunnar aukin og arðgreiðslur ÁTVR auknar um einn milljarð á ári. Báðar aðgerðirnar eiga það sammerkt að fegra stöðu ríkissjóðs þó í raun sé fé aðeins fært úr einum vasa hans í hinn.