Íslandsbanki segir að útlit sé fyrir svipaðan fjölda ferðamanna í ár og í fyrra og hóflega fjölgun eftir það. Þá telur bankinn að komið sé að þáttaskilum í ferðaþjónustu þar sem hagræðing og hámörkun virðisauka af hverjum ferðamanni taki við af örum vexti vegna hraðrar fjölgunar ferðamanna.
Þetta kemur fram í nýrri þjóðhagsspá Íslandsbanka.
Bankinn segir að ágjöf í ferðaþjónustu snemma á síðasta ári hafi leitt til samdráttar í útflutningstekjum og minni afgangs af þjónustuviðskiptum. „Ferðaþjónusta skilar þó enn þá jafnvirði nærri fjögurra af hverjum tíu krónum í gjaldeyristekjum þjóðarbúsins og ríður baggamuninn um að talsverður afgangur mun væntanlega reynast áfram af utanríkisviðskiptum.“
Bent er á, að tekjur af erlendum ferðamönnum hafi numið 382 milljörðum kr. á fyrstu 9 mánuðum ársins 2019 sem svari til ríflega 8% samdráttar í krónum talið á milli ára. Á sama tímabili hafi sjávarútvegur skilað alls 192 milljörðum í tekjur og útflutningur á áli 161 milljarði.
Þá kemur fram, að erlendir ferðamenn hafi verið tæplega tvær milljónir í fyrra og var árið þar með þriðja stærsta ferðamannaárið frá upphafi, þrátt fyrir 14% fækkun ferðamanna milli ára.
„Útlit er fyrir að fjöldi ferðamanna verði svipaður í ár og í fyrra ef marka má nýlega spá Isavia. Þá er að okkar mati komið að þáttaskilum í ferðaþjónustu þar sem hagræðing og hámörkun virðisauka af hverjum ferðamanni tekur við af örum vexti vegna hraðrar fjölgunar ferðamanna,“ segir í spá bankans.
„Okkar áætlun hljóðar því upp á u.þ.b. 3% fjölgun ferðamanna á hvoru áranna 2021-2022 sem er í takti við spár um fjölgun ferðamanna á heimsvísu.“