Sindri strandaði í innsiglingunni

Togarinn Sindri VE strandaði í innsiglingunni við Vestmannaeyjahöfn rétt eftir miðnætti í nótt. Var togarinn á leið út úr innsiglingunni þar sem hann mætti Arnarfellinu frá Samskipum. Þegar skipin mættust lenti Sindri of sunnarlega í innsiglingunni og strandaði þar, sunnanmegin á móts við Klettsnef, samkvæmt upplýsingum frá Sverri Haraldssyni, sviðsstjóra bolfisksviðs hjá Vinnslustöðinni í Vestmannaeyjum, en togarinn er í eigu fyrirtækisins.

Skipið losnaði eftir að hafnsögubáturinn Lóðsinn dró það út og er það núna við bryggju. Gekk aðgerðin vel að sögn Sverris. Einhverjar skemmdir urðu á botni skipsins en þær virðast í fyrstu vera litlar, að hans sögn. Skipið mun svo fara í slipp í Hafnarfirði þar sem skemmdirnar verða lagfærðar. Ekkert amaði að áhöfninni.

Skipið er nú á leið í slipp í Hafnarfirði. Mynd/Óskar Pétur Friðriksson

• Blogga um frétt