Vel gengur á kolmunna við Færeyjar

Veiðar á kolmunna syðst í færeyskri lögsögu hafa gengið vel undanfarið. Stærri skipin hafa oft náð fullfermi á 3-4 sólarhringum og þau sem eru með minni burðargetu hafa jafnvel fyllt sig á tveimur sólarhringum. Skipin hafa gjarnan togað í 12-16 tíma og fengið um 400-600 tonn.

Fregnir hafa borist af lóðningum á leið skipanna til og frá miðunum og gefur það vonir um að kolmunni gangi inn í íslenska lögsögu og verði hugsanlega veiðanlegur í Rósagarðinum suðaustur af landinu. Skilyrt er í reglugerð um kolmunnaveiðar í ár að 25% af aflanum séu veidd á alþjóðlegu hafsvæði eða í íslenskri lögsögu. Kolmunninn fer í bræðslu og hefur verið nóg að gera í fiskimjölsverksmiðjum frá Vopnafirði til Vestmannaeyja að undanförnu.

Búið er að veiða tæplega 70 þúsund tonn af kolmunna í ár samkvæmt yfirliti á vef Fiskistofu. Er þá eftir að veiða um 245 þúsund tonn af aflaheimildum í kolmunna.