„Ofboðslegur straumur“

„Kolmunnaveiði hefur alltaf verið köflótt og það hefur dregið mjög úr veiðinni síðustu dagana. Í þessum túr fengum við aflann í sex holum, stysta holið var sjö tímar en það lengsta átján tímar,“ segir Runólfur Runólfsson, skipstjóri á Bjarna Ólafssyni AK, sem kom til Neskaupstaðar í nótt með tæplega 1.800 tonn af kolmunna.

„Reynslan af kolmunnaveiðunum segir manni að veiðarnar geti glæðst á ný fyrirvaralítið. Við vorum núna að veiða austan við Færeyjabanka í svonefndu Ræsi, en í morgun sá ég að skipin voru farin að veiða við Múkkagrunn,“ er haft eftir Runólfi á vef Síldarvinnslunnar.

Að þessu sinni tók fjóra sólarhringa að fá aflann um borð í skipið en um síðustu mánaðamót, þegar veiðin var hvað mest, tók það um einn og hálfan sólarhring. Runólfur segir að þetta þurfi ekki að koma á óvart.

„Fyrstu tvo dagana í túrnum var leiðindaveður en síðan batnaði það. Vandamálið var hins vegar ofboðslegur straumur sem er á þessum slóðum og hann gerði okkur mjög erfitt fyrir. Ég er viss um að kolmunninn á eftir að ganga inn í íslenska lögsögu með minnkandi straumi og þar á eftir að verða veiði. Það skiptir miklu máli að veitt sé í okkar lögsögu.“

• Blogga um frétt