Vongóðir um litlar skemmdir

Ísfisktogarinn Akurey AK-10 var staddur norður af Patreksfirði um klukkan fimm í nótt þegar svokölluð undirlyftustöng í aðalvél skipsins brotnaði. Skipið átti þá eftir rúman sólarhring á veiðum en um 140 tonna afli er í lest skipsins, að sögn Eiríks Jónssonar skipstjóra.

Varðskipið Þór dregur nú Akurey til hafnar og gert er ráð fyrir að skipin verði bæði tvö komin til Reykjavíkur um hádegisbilið á morgun. Besta veður er á svæðinu og vel gekk að koma dráttartaug fyrir á milli Akureyjar og Þórs.

Gísli Jónmundsson, skipaeftirlitsmaður hjá HB Granda, segir að fljótlega eftir að stöngin brotnaði hafi verið drepið á aðalvélinni. Vélstjórar skipsins hafi kannað hvort orðið hafi meiri skemmdir en þeir séu vongóðir um að svo sé ekki. Gangi allt að óskum ætti viðgerð að ljúka á miðvikudaginn, að því er fram kemur á vef útgerðarinnar.

Frétt af mbl.is

Akurey vélarvana vestur af Vestfjörðum

• Blogga um frétt