Erfiður rekstur rækjuvinnslunnar

„Almennt er rekstur í rækjuvinnslu við Norður-Atlantshaf, bæði á Íslandi og í Noregi, búinn að vera erfiður í nokkur ár. Við fylgjumst með rekstri norsku verksmiðjanna og það er bara eins og hér, hagnaður er lítill og arðsemin alveg í lágmarki. Það sem hefur gert reksturinn erfiðan hér á landi undanfarin ár er m.a. gengisstyrkingin og launahækkanir,“ segir Óskar Garðarsson, framkvæmdastjóri rækjuvinnslunnar Dögunar á Sauðárkróki, spurður um stöðu og rekstur rækjuvinnslu á Íslandi í dag.

Lokanir verksmiðja fyrirséðar

Morgunblaðið greindi frá því í gær að FISK Seafood ehf. hefði ákveðið að loka rækjuvinnslu sinni í Grundarfirði vegna langvarandi tapreksturs. Óskar segir það hafa verið fyrirséð að einhver rækjuvinnsla hér á landi myndi leggja upp laupana. „Sérstaklega eftir að veiðin í Kanada tók dýfu og veiðin breyttist lítið hér við Ísland lá það í augum uppi að verksmiðjum myndi fækka. Viðvarandi hátt hráefnisverð á iðnaðarrækju hefur haft sín áhrif á arðsemi í landvinnslunni,“ segir Óskar.

Fimm rækjuverksmiðjur eru enn starfandi á landinu eftir lokun vinnslunnar í Grundarfirði. Voru verksmiðjurnar tugir talsins þegar best lét fyrir um tveimur áratugum, segir í umfjöllun um málið í Morgunblaðinu í dag.