Rekstrartekjur námu 18,5 milljörðum

Rekstrartekjur Síldarvinnslusamstæðunnar á árinu 2017 námu 18,5 milljörðum króna.

Greiddir og innheimtir skattar samstæðunnar ásamt opinberum gjöldum námu 4,5 milljörðum króna, veiðiheimildir hennar voru 18.200 tonn í þorskígildum og samstæðan greiddi 530 milljónir króna í veiðigjöld.

Þetta er á meðal þess sem kemur fram í útreikningum endurskoðunarfyrirtækisins PricewaterhouseCoopers á samfélagsspori Síldarvinnslusamstæðunnar.

Samfélagsspor er tiltekin aðferðafræði sem notuð er til að greina heildarframlag fyrirtækja til samfélagsins í formi skatta og opinberra gjalda, að því er kemur fram í tilkynningu.

Til Síldarvinnslusamstæðunnar töldust árið 2017, auk móðurfélagsins Bergur-Huginn ehf., Fóðurverksmiðjan Laxá hf., Runólfur Hallfreðsson ehf. og SVN eignafélag ehf.

Á meðal annarra niðurstaðna í skýrslunni er að meðaltal heildarlauna starfsmanna á árinu var 10,2 milljónir króna, staðgreiðsla af launum starfsmanna nam 1.176 milljónum króna og meðallaunakostnaður á hvert ársverk var 13,9 milljónir króna með launatengdum gjöldum.

Samstæðan greiddi 307 milljónir króna í tryggingagjald og framlög í lífeyrissjóði námu 402 milljónum króna.

Samstæðan greiddi 172 milljónir í kolefnisgjald, greiddar voru 186 milljónir í hafnargjöld og 84 milljónir í fasteignagjöld. Fjármagnstekjuskattur nam 267 milljónum króna.

Til viðbótar við samfélagssporið styrkti Síldarvinnslusamstæðan sérstaklega ýmis samfélagsverkefni um 70-80 milljónir á árinu 2017. Má þar nefna styrki til listastarfsemi og íþróttastarfsemi ásamt styrkjum til björgunarsveita og annarra félagasamtaka. Þá hefur Síldarvinnslan lagt mikla áherslu á styrkveitingar til heilbrigðismála.

• Blogga um frétt