„Það er áætlað að sá nýi haldi til veiða fljótlega eftir helgi,“ segir Kjartan Viðarsson, útgerðarstjóri sjávarútvegsfyrirtækisins Vísis hf. í Grindavík, og á þar við Sighvat GK 57, nýtt línuskip fyrirtækisins.
Sighvatur kom til Grindavíkur í júní sl. eftir endurbyggingu í Póllandi og fór fljótlega þaðan til Ísafjarðar þar sem settur var niður búnaður á millidekk.
Aðgerðalína og mælar
„Sett var aðgerðarlína í bátinn og svokallað skömmtunarkerfi sem einstaklingsmælir hvern fisk og sendir skammta niður í lest sem passa í hvert kar samhliða því að senda í land upplýsingar um stærðardreifingu á meðan á veiðum stendur. Þetta er útbúnaður sem settur er saman og hannaður af okkur hjá Vísi hf., Marel og Skaganum 3X,“ segir Kjartan.
Gamli Sighvatur GK 57 kemur úr síðasta róðri sínum í dag, fimmtudag, og þá verða veiðarfæri og annað dót fært á milli skipa. Hann mun síðan fara í sína síðustu siglingu suður til Evrópu eftir 40 ára þjónustu við Vísi hf. þar sem hann hefur borið að landi yfir 100 þúsund tonn.
Vísir með fimm línuskip
Vísir hf. verður með fimm stór línuskip í útgerð og tvo litla línubáta í krókaaflamarkskerfinu en Sævík GK 757 sem fyrirtækið keypti fyrr á árinu landaði úr sínum fyrsta róðri á Skagaströnd í fyrrakvöld. Fyrir á fyritækið Daðey GK 777.
Á Ísafirði í sumar en þar var búnaður settur niður á millidekk Sighvats GK.
mbl.is/Sigurður Bogi
Sighvatur GK, eldri báturinn, á siglingu.
Mbl.is/Hafþór Hreiðarsson
Óli Gísla GK 112 nú Sævík GK 757, smíðaður í Reykjavík árið 2006.
Mbl.is/Hafþór HreiðarssonMbl.is/Hafþór Hreiðarsson