„Þetta gekk framar vonum. Við erum mjög ánægðir með gæðin og stærðina á fiskinum. Hann er um 5 kíló slægður. Það er stærðin sem markaðurinn sækist eftir,“ segir Sigurður Pétursson, framkvæmdastjóri hjá Arctic Fish, um fyrstu slátrun á laxi af fyrstu kynslóð hjá samstæðunni á Vestfjörðum.

Laxinn er alinn í sjókvíum við Gemlufall í Dýrafirði og slátrað í vinnslu Arnarlax á Bíldudal. Arctic Fish og áður forveri þess, Dýrfiskur, hafa alið regnbogasilung í nokkur ár og slátrað silungi frá árinu 2010. Arctic Fish ákvað að hætta eldi á regnbogasilungi og snúa sér alfarið að laxeldi og eru fyrstu afurðirnar nú á leið á markað.

Reiknað er með að slátrað verði vel á þriðja þúsund tonnum af laxi á árinu. Í umfjöllun um mál þetta í Morgunblaðinu í dag segir Sigurður að það fari aðeins eftir skilyrðum í umhverfinu hvað komi upp úr kvíunum en lætur vel af vaxtarskilyrðum. Segir að laxinn hafi dafnað vel í Dýrafirði. Sjórinn hafi til að mynda verið hlýrri í vetur en á síðasta vetri.

Arctic Fish hefur leyfi til að ala 4.200 tonn af laxi í Dýrafirði og er með stækkun leyfa í umhverfismatsferli, upp í burðarþolsmat fjarðarins sem er 10 þúsund tonn. Þegar búið verður að slátra úr staðsetningunni við Gemlufall tekur næsta kynslóð við, Eyrarhlíð. Þá stefnir fyrirtækið að því að setja út stór seiði í kvíar í Patreksfirði í vor og Tálknafirði síðar í sumar.

Tengdar fréttir

Fiskeldi

„Margt hefur nú ekki beinlínis verið til fyrirmyndar“

• Segir nýtt frumvarp gefa eldisfyrirtækjum auðlindir
• Laxey fær sex milljarða
• Fjárfestingin 115 milljarðar króna
• Bátur Arnarlax verður fyrsti sinnar tegundar

» Fleiri tengdar fréttir