„Þetta er allt að koma“

„Við höfum verið fyrir austan síðustu dagana, fyrst í Berufjarðarálnum og síðan í Hvalbakshallinu, og þar hefur verið mjög góð ýsuveiði. Þetta er stór og fallegur fiskur sem þarna fæst,“ segir Hilmar Stefánsson, skipstjóri á Vestmannaey VE.

Góður afli hefur að undanförnu verið hjá ísfisktogurunum Gullver NS, Vestmannaey VE og Bergey VE. Gullver landaði síðast fullfermi á Seyðisfirði 4. febrúar og var ýsa uppistaða aflans. Vestmannaey landaði fullfermi í Neskaupstað 3. febrúar og var aflinn mestmegnis ýsa. 

Í dag landar Vestmannaey í Vestmannaeyjum og er aflinn um 60 tonn, mest þorskur og ýsa. Bergey landaði fullfermi á Eskifirði 31. janúar og var aflinn að mestu ýsa. Aftur landaði Bergey fullfermi í Vestmannaeyjum 4. febrúar og enn og aftur var ýsa uppistaða aflans. Þá landaði skipið í Eyjum á ný 5. febrúar, aflinn var 40 tonn, mest ufsi og þorskur, að því er fram kemur á vef Síldarvinnslunnar, en rætt var við Hilmar skipstjóra í gær.

„Hann spáir norðanáttum næstu daga eða fram á sunnudag og ég reikna með að eftir löndun verði veitt við Eyjarnar. Bergey var að fá fínan afla í fyrradag suður af Eyjum og það er farið að líða að vertíð, þetta er allt að koma – það er kominn tími á vertíðina og hún er ávallt tilhlökkunarefni.“

• Blogga um frétt