Sigldu yfir loðnutorfur fyrir austan

Skipstjórinn á norska uppsjávarskipinu Åkerøy sigldi yfir loðnutorfur suðaustur af landinu á leið til Norðfjarðar á mánudag.

Birkir Bárðarson, fiskifræðingur á Hafrannsóknastofnun, segir þetta ekki miklar fréttir í sjálfu sér því rannsóknaskipið Árni Friðriksson hafi mælt rúmlega 200 þúsund tonn af loðnu úti fyrir Austurlandi í lok síðustu viku, meðal annars á svipuðum slóðum og norski skipstjórinn hafi siglt yfir loðnutorfur. Full ástæða sé til að ætla að þetta sé hluti af þeirri göngu.

Áætlað var að Árni Friðriksson færi út frá Eskifirði í gærkvöldi til að vakta göngu loðnunnar fyrir austan og norðaustan land. Veðurútlit er ekki gott á þessum slóðum, en í dag verður væntanlega tekin ákvörðun um hvort og hvenær veiðiskip fara einnig til leitar. Birkir segir að miðað við aflareglu vanti enn nokkuð upp á til að upphafskvóti verði gefinn út.