Umsókn Hvals hf. um leyfi til veiða á langreyðum í ár er enn í vinnslu hjá atvinnuvega- og nýsköpunarráðuneytinu. Þetta kemur fram í svari ráðuneytisins við fyrirspurn mbl.is.
200 mílur greindu frá því í gær að fyrirtækið hefði enn ekki fengið nýtt leyfi til langreyðaveiða, þrátt fyrir að hafa sótt um slíkt leyfi 14. mars.
Segir þar enn fremur að ráðuneytið hafi kallað eftir umsögn Fiskistofu og nú síðast umsögn Hafrannsóknastofnunar, í gær.
150 manns við veiðar og verkun í fyrra
Alls voru 145 langreyðar veiddar við landið á síðasta ári, en engar hafa verið veiddar í ár. Um 150 manns unnu við veiðar og verkun hjá Hval í Hvalfirði og Hafnarfirði á vertíðinni í fyrra, sem stóð í samtals 98 daga frá 19. júní.
Ljóst má því telja að vertíðin væri hafin í ár, ef tekið er mið af síðasta ári, væri Hvalur búinn að fá jákvætt svar við umsókn sinni. Í svari ráðuneytisins segir að Hvalur hafi ekki lagt fram kvörtun vegna þessa.
Veiðar á 209 langreyðum leyfðar
Fyrirkomulag hvalveiða er með þeim hætti að þær eru frjálsar þeim sem fengið hafa leyfi uns tiltekinn heildarfjöldi dýra hefur verið veiddur, samkvæmt reglugerð sem Kristján Þór Júlíusson sjávarútvegs- og landbúnaðarráðherra gaf út 19. febrúar. Í viðauka hennar segir einnig að leyfilegur heildarafli á langreyði og hrefnu skuli nema þeim fjölda dýra sem kveðið sé á um í veiðiráðgjöf Hafrannsóknastofnunar.
Ráðgjöf stofnunarinnar fyrir yfirstandandi ár hljóðar upp á veiðar á samtals 209 langreyðum.