Makrílvertíð hafin í Neskaupstað

Makrílvinnsla hófst í fiskiðjuveri Síldarvinnslunnar í Neskaupstað á laugardag þegar Margrét EA kom þangað með fyrsta farm vertíðarinnar, 840 tonn.

Þetta kemur fram í frétt á vef Síldarvinnslunnar, en þar segir að eins og venjulega hafi verið að ýmsu að hyggja þegar vinnsla hófst, enda vélbúnaður fiskiðjuversins flókinn.

Þegar vinnslu úr Margréti lauk var Beitir kominn til hafnar með 860 tonn og hófst vinnsla úr honum í morgun, um það leyti sem Börkur kom til hafnar með 600 tonn.

„Það gekk býsna vel að ná aflanum. Við fengum hann í sex stuttum holum, en það er aldrei togað lengur en í þrjá og hálfan til fjóra tíma. Við hófum veiðar við Háfadýpið en enduðum austan við Skaftárdýpi og það er örugglega makríll enn austar. Það bendir allt til þess að töluverður makríll sé á ferðinni en eins og venjulega er veiðiárangur misjafn. Hann blossar upp á tilteknu svæði en svo getur hann horfið þar býsna snögglega. Mér líst bara vel á þessa makrílvertíð, allavega fer hún ágætlega af stað,“ segir Tómas Kárason, skipstjóri á Beiti.

Auk makrílskipanna sem landa afla sínum í fiskiðjuverið hófst löndun á frystum makríl úr Hákoni EA í Neskaupstað í morgun. Afli skipsins er 650 tonn.

• Blogga um frétt