Mikill fjöldi grindhvala en fá svínhveli

Dýr sem komið hafa á land í hvalrekum eða hvalavöðum og drepist eða verið aflífuð hafa sennilega sjaldan eða aldrei verið fleiri síðustu áratugi. Þar eru grindhvalir í miklum meirihluta, en alls hafa 136 grindhvalir synt á land í ár og drepist eða verið aflífaðir, en voru sex allt árið í fyrra.

Í nokkrum tilvikum tókst að reka grindina aftur á haf út og þau dýr eru því ekki talin með í heildartölu dauðra dýra. Nokkur dæmi eru um að stöku grindhvalur hafi strandað ekki ýkja langt frá þeim stað þar sem hvalavaða gekk á land skömmu áður og gætu þeir því tilheyrt þeim hópum.

Í umfjöllun um hvalrekana í Morgunblaðinu í dag segir Sverrir Daníel Halldórsson, líffræðingur hjá Hafrannsóknastofnun, hafa alls 153 dýr verið færð til bókar um hvalreka hjá stofnuninni á þessu ári og eru þau rúmlega 100 fleiri en í fyrra. Hvalir af öðrum tegundum en grindhvölum eru nokkru færri en í fyrra og sérstaklega hefur andarnefjum fækkað. Þær voru 23 í fyrra en einungis tvær í ár, sem er á svipuðu róli og undanfarinn áratug. Aðrir frekar sjaldgæfir svínhvalir eins og norðsnjáldri og skugganefja hafa ekki fundist á fjörum á þessu ári en voru sex í fyrra.