Miklar breytingar á fiskveiðistjórnun í Rússlandi og kvótakerfi hafa ýtt breytingum af stað. Annað framfaraskref tengist nýrri löggjöf sem felur meðal annars í sér hvatningu til fjárfestinga. Í kjölfarið verða skip og fiskiðjuver öflugri og hagkvæmari. Þróunin hefur verið hröð og á ýmsum stöðum koma Íslendingar við sögu.
„Rússneskur sjávarútvegur á fleygiferð“, var heiti á erindi Kristjáns Hjaltasonar á markaðsdegi Iceland Seafood í gær. Þar fjallaði hann m.a. um þessa þróun, en Kristján er sölustjóri rússneska fyrirtækisins Norebo á meginlandi Evrópu. Hann heyrir undir Evrópudeild fyrirtækisins, sem stjórnað er frá Englandi. Þar er Skagamaðurinn Sturlaugur Haraldsson í forsvari og er Bandaríkjamarkaður einnig á hans könnu. Þriðji Íslendingurinn hjá sölufyrirtæki Norebo í Evrópu er Andri Geir Alexandersson.
Íslenski skólinn
Kristján og Sturlaugur réðust til Norebo fyrir um áratug, en fyrirtækið hét þá Ocean Trawlers og var stofnað 1997, en nafni þess var breytt fyrir þremur árum. Hjá fyrirtækinu var þá Magnús Gústafsson, sem leiddi markaðsstarf fyrirtækisins í Bandaríkjunum, en hafði m.a. áður stýrt Coldwater Seafood í Bandaríkjunum. Kristján starfaði m.a. áður sem sjálfstæður ráðgjafi og sem sjávarútvegssérfræðingur hjá Glitni og í 20 ár hjá Sölumiðstöð hraðfrystihúsanna (Icelandic Group) í Þýskalandi, Frakklandi og Íslandi. Kristján hefur aðsetur í Berlín, en fer reglulega til Bretlands og á verksviði hans er sala á frystum flökum á meginlandi Evrópu og í fyrra bættist rækja við.
Í samtali við Morgunblaðið í dag segir Kristján að árangur Íslendinga í veiðum, vinnslu, tækni og markaðsmálum sé þekktur víða um heim. Meðal annars sé horft til íslenska skólans við þróun sjávarútvegs í Rússlandi.