Herkúles víkur fyrir Gretti sterka

Icetug hefur í ár selt tvo af öflugum dráttarbátum sínum. Fyrst fór Togarinn til nýrra eigenda og í haust var Grettir sterki einnig seldur. Nafnið hverfur þó ekki úr flotanum, því dráttarbáturinn Herkúles fær nafn Grettis.

Ægir Örn Valgeirsson, stjórnarformaður Icetug og framkvæmdastjóri Skipaþjónustu Íslands, segir að komum skemmtiferðaskipa hafi fækkað gríðarlega í ár. Þeir eins og aðrir rekstraraðilar hafi þurft að laga sig að nýjum aðstæðum eftir að kórónufaraldurinn skall á. Erfið samkeppnisstaða gagnvart Faxaflóahöfnum kalli einnig á endurmat, en fyrir ári kom nýr Magni til Faxaflóahafna og var kaupverð hans röskur milljarður.

Icetug keypti þrjá öfluga dráttarbáta frá Hollandi 2018 og fengu þeir nöfnin Herkúles, Grettir og Kolbeinn grön. Bátarnir eru smíðaðir í Hollandi 1998, 30 metrar að lengd og átta metra breiðir. Síðasta verkefni Grettis undir íslenskum fána var að draga Eldborg í brotajárn í Belgíu.