Náði flottum myndum djúpt norður af Vestfjörðum
Setja bókamerki
Stór hluti togaraflotans var fyrrihluta desember á Strandagrunni og veiðin var með ágætum. Þorskur og ýsa var uppistaða aflans sem var frystur og pakkað um borð. Strákarnir á Hrafni Sveinbjarnarsyni GK komu í land daginn fyrir Þorláksmessu.
Sagt var frá veiðiferðinni í blaði 200 mílna 12. desember og fylgdi henni fjöldi mynda, m.a. frá vélstjórnaum Ægi Óskari Gunnarssyni.
Áhöfnin á Hrafni Sveinbjarnarsyni GK hefur fiskað vel síðustu daga, en togarinn er nú á Strandagrunni en svo heita mið djúpt norður af Vestfjörðum. Stærstur hluti togaraflotans hefur verið þar að undanförnu, enda á vísan að róa um góðan afla. „Einn, tveir, þrír ... já, mér sýnast hérna vera nærri tuttugu skip svona við lauslega talningu,“ sagði Ægir Óskar Gunnarsson 1. vélstjóri þegar Morgunblaðið ræddi við hann fyrr í vikunni.
Fyrir norðan land nýtur birtu aðeins skamma stund um miðjan daginn nú þegar komið er fram í desember. Menn eru því nánast alltaf í myrkri, nema hvað heil ljósaborg er á hafinu þegar togararnir eru allir á svipuðum slóðum.
Akureyrartogarar og Suðurnesjaskip
„Hér eru Vestfjarðaskip, Akureyrartogarar og aðrir sem gerðir eru út frá Reykjavík og Suðurnesjum. Hingað stefna flestir og sækja í þorsk og ýsu. Það er fiskurinn sem markaðurinn kallar eftir og hér um borð er aflinn verkaður, frystur og settur í umbúðir. Þetta er mikil vinna og tarnirnar oft mjög hressilegar – þegar við fáum góð höl,“ segir Ægir.
Eins og á öðrum frystitogurum eru í hverjum túr alls 26 manns í áhöfn Hrafns Sveinbjarnarsonar. Nú standa vaktina Valur Gunnarsson skipstjóri og hans gengi, valinn maður í hverju rúmi. Í hinni áhöfninni er Kristján Ólafsson skipstjóri.
Allir vinir og veiðin er góð
Skipstjórnarmenn og vélstjórar á togaranum standa tólf tíma vaktir, en lotur hásetanna eru átta klukkustundir. „Hver túr hjá okkur er yfirleitt fjórar vikur, en þessi verður reyndar aðeins skemmri,“ segir Ægir Óskar.
„Í byrjun mánaðarins var bræla á miðunum sem við biðum af okkur í landi. Fórum svo út 3. desember og þá strax hingað norður fyrir Vestfirði. Verðum hér sjálfsagt meðan gefur, en ætlunin er að koma í land 22. desember. Við svona rétt náum í skötuveisluna á Þorláksmessu og heim til fjölskyldunnar áður en hátíðin gengur í garð. Og það er fínt að vera á sjónum; því hér um borð er fínn mannskapur og mórallinn er góður. Allir vinir og veiðin er góð.“
Shakespeare fannst í skókassa
Vélsleðaslys: Þyrlan kölluð út á mesta forgangi
Handteknir eftir myndatöku í Vesturbæjarlaug
„Umsátursástand“
Banna mengandi búnað sem leyfður er á Íslandi
Eyjafjarðarbraut lokað vegna alvarlegs umferðarslyss
Væri að ljúga ef ég segðist ekki stressaður