Tíu þúsund lítrar af olíu um borð

Mikið tjón varð hjá fiskeldisstöðinni Löxum í Reyðarfirði þegar fóðurprammi sem sér 16 fiskeldiskvíum fyrir fóðri sökk í vondu veðri í gær. Um tíu þúsund lítrar af díselolíu eru um borð í prammanum sem er nú á sjávarbotni. Engin svartolía er þó um borð.

Varðskip Landhelgisgæslunnar, Þór, er á vettvangi en viðbragð er að öðru leyti í höndum fyrirtækisins.

Í samtali við mbl.is segir Jens Garðar Helgason, framkvæmdastjóri Laxa fiskeldis, að ekki sé gert ráð fyrir að olía leki í miklum mæli í sjóinn en allur búnaður og girðingar séu þó til taks ef illa fer.

Ljósmynd/Landhelgisgæslan

Aftakaveður var á öllu Austurlandi í gær, kalt og mikill vindur. Vatn fór að leka inn á prammann á níunda tímanum en til allra heilla var varðskipið Þór í firðinum og kom á vettvang. Var það hins vegar mat viðbragðsaðila að ekkert væri hægt að gera að svo stöddu. Pramminn fylltist fljótt af sjó og sökk svo í nótt.

Frétt af mbl.is

Fóðurprammi sökk í Reyðarfirði

„Þetta var aftakaveður sem við sjáum bara á nokkurra ára fresti,“ segir Jens. Aðspurður segir hann að hugsanlegt sé að ís hafi farið að hlaðast utan á prammann og hann sokkið út af ofhleðslu. „En þetta á allt eftir að koma í ljós.“

Páll Geirdal, skipherra á varðskipinu Þór, segir í samtali við mbl.is að Landhelgisgæslan sé í viðbragðsstöðu en ekki sé hægt að bjarga prammanum fyrr en lægir. 

Nokkur olía hefur að hans sögð lekið úr prammanum í gegnum „öndunarop“ á olíutanknum, olíubrák er á vatninu og lyktin eftir því. Hann hefur þó ekki áhyggjur af meiri háttar leka. Leki olían verði hún þó fljót að berast á haf út enda díselolían létt og mikill vindur í þokkabót.

Pramminn í fyrra. mbl.is/Þorgeir

• Blogga um frétt