Fimm ára samningur við Fisktækniskólann

Fisktækniskóla Íslands í Grindavík hefur verið falið að annast kennslu sjávarútvegsgreina á staðfestum námsbrautum í samræmi við lög um framhaldsskóla. Samningur milli skólans og mennta- og menningarmálaráðuneytisins var undirritaður nýverið og er hann til fimm ára. Á þessum tíma verður framlag ríkisins 71 milljón á ári eða 355 milljónir í heild.

Fram kemur í tilkynningu á vef Stjórnarráðsins að skólinn hafi starfað frá 2010 og að markmið hans sé að stuðla að menntun fólks í sjávarútvegi og þannig auka fagþekkingu og nýliðun í greininni.

„Um 160 nemendur stunda nám við skólann. Kennslan fer að mestu fram í Grindavík en skólinn er einnig með aðstöðu í Garðabæ, Reykjavík og á Bíldudal. Á fjórða hundrað nemenda hafa lokið námi af skilgreindum brautum skólans, þar af um eitt hundrað frá samstarfsskólum og fræðsluaðilum á Sauðárkróki, Tröllaskaga, Dalvík, Akureyri og Höfn í Hornafirði,“ segir í tilkynningunni.

Frétt af mbl.is

Fisktækniskólinn fái 71 milljón

Sagt var frá áformunum um að ganga til samninga um fisktækninám í vor, en nú hafa þau orðið að veruleika.

„Sjávarútvegurinn er ein af undirstöðuatvinnugreinum okkar Íslendinga og á vettvangi Fisktækniskólans er sannarlega verið að skapa verðmæti til framtíðar. Hér er vel búið að fjölbreyttum nemendahópi og við vonum að skólastarfið dafni vel til framtíðar,“ segir Lilja Alfreðsdóttir, mennta- og menningarmálaráðherra.

• Blogga um frétt