Úkraínskur flóttamaður ráðinn strax til starfa

Faxaflóahafnir hafa ráðið til starfa ungan Úkraínumann, sem flúði heimaland sitt til Íslands eftir innrás Rússa.

Frá þessu greina Faxaflóahafnir á Facebook og taka fram að hann hafi barið að dyrum fyrir viku og viljað kanna hvort hann gæti starfað hjá fyrirtækinu.

Maðurinn, að nafni Róman Drahúlov, hafi hug á að búa hér á landi í framtíðinni.

Róman Drahúlov. Ljósmynd/Faxaflóahafnir

Í takti við stefnu fyrirtækisins

„Ákveðið var að ráða hann strax til starfa hjá hafnarþjónustu Faxaflóahafna, þar sem hans starfskraftar munu nýtist vel í hafnarþjónustustörfum,“ segir í tilkynningunni.

Hann sé fyrsti erlendi starfsmaðurinn sem ráðinn hafi verið til Faxaflóahafna, sem séu ánægjuleg tímamót og í takti við stefnu fyrirtækisins um að auka fjölbreytileika meðal starfsmanna fyrirtækisins. Hann er þar að auki yngsti núverandi starfsmaður hjá hafnarþjónustu Faxaflóahafna en hann er fæddur árið 1999.

Er hann lærður vélstjóri og hefur starfað sem slíkur í nokkur ár.

• Blogga um frétt