„Kallar „mayday“ og um leið er virkjuð þyrlusveit“

Að mati Ásgeirs Erlendssonar, upplýsingafulltrúa Landhelgisgæslu Íslands, hefðu björgunaraðgerðir í morgun ekki getað gengið mikið betur. Vélarvana fiskibát var bjargað rétt utan við Keflavík um hálf tíu í morgun. Hann hafði þá rekið upp að bergi norður af smábátahöfninni í Reykjanesbæ.

Hér fyrir ofan er hægt að sjá myndskeið frá Landhelgisgæslunni af björgunaraðgerðunum í dag.

Frétt af mbl.is

Viðbragðstíminn var „frábær“

Ásgeir segir að björgunin hafi gengið eins vel og hægt var að vona og að samkvæmt upplýsingum Landhelgisgæslunnar hafi ekki orðið alvarlegar skemmdir á bátnum. 

Einn besti viðbragðstími

„Málið hefst á því að skipstjórinn kallar „mayday“ og um leið er virkjuð þyrlusveit á flugvellinum og sjóbjörgunarsveitir og lögreglu,“ segir Ásgeir um upphaf björgunarinnar. 

Eins og greint hefur verið frá tók það aðeins átta mínútur fyrir björgunarsveit Suðurnes að komast á vettvang og hefja björgun eftir að útkallið barst. Þyrla Landhelgisgæslunnar var einnig fljót á staðinn en hún var komin tuttugu mínútum eftir að skipstjóri fiskibátsins kallaði eftir hjálp.

Frétt af mbl.is

Þyrlan kölluð út á mesta forgangi

Að mati Ásgeirs er þetta einn besti viðbragðstími sem hefur sést. Hann bendir á að ekki hefði mátt líða mikið lengri tími áður en að brugðist var við enda var báturinn farinn að nuddast við klettana og því hætta á ferðum fyrir skip og skipstjóra.

Ljósmynd/Landhelgisgæslan

Gekk allt eins og í sögu

„Þetta gekk í rauninni allt eins og í sögu. Við þessar aðstæður skiptir viðbragðstíminn öllu máli. Það getur verið mjög hættulegt þegar svona er og sérstaklega þegar skipið er komið upp við kletta, þá skiptir hver mínúta máli.“

Hann segir það mjög lukkulegt að áhöfn þyrlunnar hafi verið að undirbúa æfingarflug þegar að útkallið barst. Vegna þessa þurfti áhöfnin bara að klæða sig í sjóbjörgunargalla áður en að þau gátu lagt af stað á vettvang.

Hann segir þó að þyrlan hafi ekkert þurft að grípa inn í á meðan á björgun stóð og hafi svifið yfir til öryggis. Hann ítrekar mikilvægi þess að allt hafi gengið vel enda var þó nokkur hætta á ferðum. 

• Blogga um frétt