Skeljungur fyrstur með lífdíselblöndu fyrir skip

Skeljungur getur nú tekið við forpöntunum á skipadísel með 10% lífdíselblöndu og er orðið fyrsta olíufélagið sem býður upp á þessa vöru. Fyrstu farmar eldsneytisins eru væntalegir á vormánuðum, að því er fram kemur í fréttatilkynningu.

Þar segir að ákveðið hafi verið að auka framboð af umhverfisvænni valkostum í vöruframboði félagins í samræmi við stefnu Skeljungs um að vera traustur félagi fyrirtækja í orkuskiptum, en í því skyni hefur félagið sett sér markmið um að stuðla að samdrætti í óbeinni losun gróðurhúsalofttegunda í virðiskeðju sinni.

„Félagið hefur því unnið að þróunarverkefni um lífdíselblandað skipadísel. Með því að nota skipadísel með lífdíselblöndu geta fyrirtæki í sjávarútvegi náð að draga töluvert úr kolefnislosun í sínum rekstri,“ segir í tilkynnignunni.

Raunhæfur valkostur

Lífdísel er framleitt úr endurnýjanlegum hráefnum eins og jurtaolíu og dýrafitu. Lífdísel er sjálfbærari valkostur en hefðbundið skipadísel sem unnið eru eingöngu úr jarðefnaeldsneyti. Fullyrt er að afköst og orkuinnihald er svipað og hefðbundið dísel. Er lífdísel því sagt raunhæfur valkostur til notkunar í díselknúnum vélum.

„Það hefur svipaðan þéttleika, seigju og orkuinnihald og dísel. Að auki hefur lífdísel hærri cetantölu en hefðbundið dísel, sem þýðir að það kviknar auðveldara og brennur á skilvirkari hátt, sem skilar sér í betri afköstum vélarinnar og sparneytni.“

• Blogga um frétt