Gengur vel að rétta Wilson af
Setja bókamerki
Björgunaraðgerðir vegna flutningaskipsins Wilson Skaw eru í fullum gangi og ganga aðgerðir samkvæmt áætlun. Unnið er að því að minnka stafnhallann á skipinu til þess að Freyja geti komist upp að því og aðstoða megi við tilfærslu á farmi.
Björgunaráætlun vegna skipsins var samþykkt á fimmtudag.
„Hún kveður á um að þegar þessu er lokið, það er að segja þegar er búið að rétta skipið af að þá fari Freyja utan á flutningaskipið og síðan verði unnið að því að færa farminn til til þess að það verði rétt burðarþol í skipinu, það er að segja að það sé rétt lestun á skipinu þegar að það verður á endanum dregið til Akureyrar þegar búið er að færa farminn til,“ segir Ásgeir Erlendsson, upplýsingafulltrúi landhelgisgæslunnar, í samtali við mbl.is
Freyja utan á Wilson í dag
Hann gerir ráð fyrir því að þessar aðgerðir muni taka einhverja daga en Freyja muni fara utan á Wilson í dag. Í kjölfarið verði þá hægt að vinna í færslunni á farminum.
„Það mun fara fram þannig að Freyja leggst utan á Wilson og það eru tveir kranar á hliðum Freyju sem eru færanlegir sem geta þá tekið þennan farm. Hluti farmsins þarf þá að fara um borð í Freyju, síðan aftur um borð í skipið og það þarf þá í rauninni að endurraða farminum samkvæmt þeim útreikningum sem gerðir hafa verið til þess að tryggja að það sé sem öruggast að flytja skipið til Akureyrar,“ segir Ásgeir.
Gert er ráð fyrir að þessu ljúki ekki fyrr en um miðja næstu viku en í kjölfarið megi hefja drátt á skipinu til Akureyrar.
Ásgeir segir aðgerðina hafa tekið mið af öryggi skipsins og umhverfisins. Varlega sé farið meðal annars til þess að það verði ekki umhverfisskaði. Aðgerðir sem þessar geti tekið tíma en þessi aðgerð sé þó á áætlun.
Norska flutningaskipið Wilson Skaw strandaði við Ennishöfða á Húnaflóa 18. apríl en losnaði svo af strandstað fyrir um viku síðan og var dregið á öruggari stað inn í Steingrímsfjörð. Um borð í skipinu eru tvö þúsund tonn af salti.
Norskur lögreglumaður dæmdur
Mál hjúkrunarfræðingsins fer aftur fyrir héraðsdóm
Nemendur í HÍ reistu tjaldbúðir án leyfis
Frambjóðendur skila inn listum í Hörpu
Kaldasti veturinn kom að óvörum
Strand skemmtiferðaskips kallar á erlenda aðstoð
Hvorki sést áður hér á landi né annars staðar
/frimg/1/29/32/1293273.jpg)
Ekki af baki dottinn og ætlar að opna B5 aftur