Um það bil eitt og hálft ár er liðið síðan Freyja, nýjasta skip Landhelgisgæslunnar, kom fyrst til hafnar á Íslandi. Var skipið smíðað í Kóreu eftir norskri hönnun og sjósett árið 2010, ári áður en varðskipið Þór kom til landsins, og hafði verið notað til að þjónusta olíuiðnaðinn, m.a. í Evrópu og undan ströndum Brasilíu áður en íslensk stjórnvöld keyptu fleyið.

Einar Valsson er skipherra á Freyju og segir hann fyrsta eina og hálfa árið hafa gengið vel: „Freyja er hönnuð sem dráttar- og þjónustuskip og fyrir vikið er allur búnaður, kranar, dráttar- og spilbúnaður mjög öflugur, og slökkvibyssurnar sömuleiðis, og hentar mjög vel okkar störfum þó svo skipið sé ekki hannað beint til eftirlits og landhelgisgæslu.“

Þilfar Freyju þykir stórt og henta vel til verkefna skipsins. Ljósmynd/Þorsteinn Dagur Rafnsson

Áhöfnin í útkalli. Freyja hefur mikla dráttargetu og hefur sannað notagildi sitt. Ljósmynd/Guðmundur St. Valdimarsson

Aðlagað að þörfum

„Skipið er nokkuð stórt, og mælist um 4.600 tonn, og var ekkert stórvægilegt sem þurfti að breyta til að taka það í notkun hjá Landhelgisgæslunni. Verið er að laga skipið að okkar rekstri og þörfum. T.d. bæta geymslur og setja upp björgunarbúnað sem ekki var til staðar áður. Þá getur skipið tekið um borð og unnið með mengunarvarnabúnað Umhverfisstofnunar, sem reyndist vel á dögunum þegar flutningaskipið Wilson Skaw strandaði á Húnaflóa, en þá var mengunarvarnagirðingu komið fyrir við skipið á strandstað og svo aftur inni á Steingrímsfirði eftir að skipið var dregið þangað.“

Frétt af mbl.is

Wilson girtur af til öryggis

„Einnig var allri eldsneytisolíu dælt úr hinu laskaða skipi yfir í Freyju, þar sem notaðir voru barkar frá Umhverfisstofnum til að koma olíunni á milli skipanna. Frá því að skipið var tekið í notkun hjá Landhelgisgæslunni hefur reynt á ýmsan búnað skipsins sem hefur reynst vel í alla staði,“ segir Einar.

Guðni Th. Jóhannesson forseti skoðar útsýnið úr brúnni í nýlegri heimsókn um borð Freyju. Ljósmynd/Guðmundur St. Valdimarsson

Greinina má lesa í heild sinni í síðasta blaði 200 mílna.

Tengdar fréttir

Landhelgisgæslan

Annasamt hjá áhöfnum Landhelgisgæslunnar

• Eina tilboðið í slipptöku Freyju ógilt
• Bráðvantar bryta á Freyju
• Áhöfn Freyju boðið í skötu í Guðmundarbúð
• Varðskipið nötraði

» Fleiri tengdar fréttir