Allir hjá Hval halda vinnu
Setja bókamerki
Engum þeim starfsmanni Hvals hf. sem ráðinn var til fyrirtækisins fyrir áformaða hvalveiðivertíð í sumar hefur verið sagt upp störfum, enda þótt bann hafi verið lagt við hvalveiðum út ágústmánuð og engar tekjur þar af leiðandi af veiðunum. Þetta staðfestir Kristján Loftsson framkvæmdastjóri Hvals í samtali við Morgunblaðið.
Þetta á bæði við um starfsmenn í landi sem og áhafnir hvalbátanna tveggja sem liggja nú við festar Reykjavík á meðan þess er beðið að hvalveiðibanninu ljúki, en svo sem kunnugt er gildir veiðibannið til 1. september nk. Hér er um að ræða á annað hundrað starfsmenn Hvals. Skipting starfsmanna eftir starfssviðum er þannig að 25 manns eru í áhöfnum hvalbátanna, 65 manns eru í Hvalfirði og 20 manns í frystihúsinu í Hafnarfirði.
Svo sem kunnugt er setti Svandís Svavarsdóttir, matvælaráðherra, reglugerð sem bannaði veiðar á langreyði í sumar og tók hún gildi 20. júní sl., degi áður en hvalveiðarnar áttu að hefjast.
Kristján segir að búið hafi verið að lofa á annað hundrað manns vinnu á vertíðinni og ekki hafi annað staðið til en að standa við þau loforð, sumir hafi verið byrjaðir þegar bannið var sett en aðrir rétt ókomnir til starfa. „Það hefur engum verið sagt upp vegna hvalveiðibannsins. Þeir sem voru byrjaðir eða rétt ókomnir eru allir við störf hjá okkur og við erum að gera okkur klára til að byrja veiðarnar þann 1. september,“ segir Kristján.
-Hvað er mannskapurinn að gera, fyrst engar eru veiðarnar?
„Menn finna sér eitthvað til dundurs, eins og þar stendur,“ segir Kristján, en fjölmörgum verkefnum segir hann að þurfi að sinna þrátt fyrir að hvalur sé ekki veiddur. Hann segir menn vera að dytta að, mála og hreinsa, til þess að hafa hlutina tilbúna þegar veiðin hefst á ný. „Það var allt tilbúið hjá okkur í vor, en það má alltaf gera betur. Það verður a.m.k. ekki verra núna en í vor,“ segir Kristján.
Kristján segist ekki hafa á hraðbergi kostnað vegna þessa, en hann sé þó töluverður eins og búast mátti við.
Kerfið féll á prófinu
Hyggst skoða lög um nafnabreytingar
Umboðsmaður barna krefur ráðherra um svör
Sláandi tölur kalla á djúpa greiningu
„Björguðu lífi þessa fólks“
Myndband: Hnúfubakar komu fjölskyldu á bát á óvart
Kennir að vera Íslendingur í þúsundasta skipti