„Þetta voru 17 fyrirtæki og þau eru öll hætt“

Oddný Anna Björnsdóttir, framkvæmdastjóri Samtaka smáframleiðenda matvæla, skrifaði grein í Bændablaðið í síðustu viku þar sem hún fjallar um lögin sem sett voru á skeldýrarækt árið 2011.

Segir hún þáverandi formann Samtaka atvinnulífsins hafa sagt í viðtali að frekar ætti að tala um „lög um bann við skeldýrarækt“ þar sem leyfisveitinga- og eftirlitskerfið sem sett var í kringum greinina hefði kæft hana í fæðingu. Þá rækti enginn krækling (bláskel) til sölu á markaði hér á landi og allir þeir sem störfuðu innan greinarinnar þegar lögin tóku gildi eða sóttu um leyfi eftir það hafi lagst í dvala eða hætt alfarið.