Fyrsta löndun ársins í Grindavík

Fyrir klukkan 10 í morgun lauk fyrstu löndun ársins í Grindavíkurhöfn. Það var togarinn Sturla GK, í eigu Þorbjarnar, sem kom í land með 27 tonn af bolfiski.

Þetta segir Sigurður Arnar Kristmundsson, hafnarstjóri Grindavíkurhafnar, í samtali við mbl.is.

Sturla GK lagði af stað frá Hafnarfirði 2. janúar og var að veiðum vestur af Sandgerði.

Aflinn er sem fyrr segir um 27 tonn og skiptist hann þannig að ýsa nam 11 tonnum, þorskur 10 tonnum og síðustu 6 tonnin voru bland. Sigurður gerir ráð fyrir því að hluti aflans fari til vinnslu í fiskvinnslu Þorbjarnar í Grindavík og einhver hluti fari á fiskmarkaðinn. Sturla GK fer svo aftur út á veiðar í kvöld.

Verka fiskinn í Grindavík

Sigurður segir að hjá skipstjóranum Birgi Laufdal og stýrimanninum Páli Árna komi ekkert annað til greina en að landa í Grindavíkurhöfn eins mikið og mögulegt er.

Þar að auki kom flutningaskipið Vermland með fiskfóður í höfnina í morgun og losaði um 30 tonn af fiskifóðri fyrir Fiskeldisfyrirtækið Benchmark Genetics. Sigurður var mættur snemma í morgun til að taka á móti því. 

„Ég beið bara spenntur eftir því að fá þessa hreyfingu hérna inn. Vonandi er þetta bara upphafið á þessu,“ segir Sigurður.

Hann gerir ráð fyrir því að umsvifin á höfninni fari að aukast aftur á nýjan leik.

„Ég tala nú ekki um ef við fáum norðanátt að þá bara á ég von á því að skipin komi bara öll hér til löndunar,“ segir hann að lokum.

• Blogga um frétt