Landa fullfermi annan hvern dag

„Segja má að þetta hafi gengið eins og í sögu og það er gjarnan landað fullfermi annan hvern dag,“ segir Arnar Richardsson, rekstrarstjóri útgerða Vestmannaeyjar VE og Bergs VE, í færslu á vef Síldarvinnslunnar um veiði skipanna undanfarið.

„Skipin fóru til dæmis út eftir löndun sl. fimmtudag og þau komu til löndunar á laugardagsmorgun. Farið var út eftir löndunina þá og komið á ný til löndunar í morgun.“ Hann segir stefnt að löndun á ný á miðvikudag.

„Þetta gengur svona fyrir sig og það eru allir glaðir. Veitt hefur verið í nágrenni Eyjanna, mest í Háfadýpi og á Pétursey. Aflinn á laugardag var mest ýsa og þorskur en í dag eru skipin með ýsu, þorsk og ufsa. Við reynum að keyra á ýsu og ufsa eins og við getum en þorskurinn kemur alltaf með. Þetta er vertíðartími og þrusugangur í þessu,” segir Arnar.

• Blogga um frétt