Beiðni barst frá fiskiskipi í vanda

Aðstoðarbeiðni barst síðdegis í gær frá fiskiskipi sem statt var um 15 sjómílur norðvestur af Garðskaga. Aðalskrúfa skipsins var óvirk en vélar í lagi, sem og bógskrúfa.

„Björgunarskipið Hannes Þ. Hafstein lagði úr Sandgerðishöfn rétt upp úr klukkan 17:30 og hélt áleiðis að fiskiskipinu. Engin yfirvofandi hætta var á ferðum, en ljóst að skipið kæmist ekki fyrir eigin vélarafli til hafnar,“ segir í tilkynningu frá Slysavarnarfélaginu Landsbjörg.

Þegar BS Hannes Þ. Hafstein kom að skipinu kom í ljós að erfitt myndi reynast að koma dráttartaug í stefni þess. Skipstjóri Hannesar óskaði þá eftir að BS Jóhannes Briem yrði kallaður út og yrði til taks. Vegna sjólags þurfti að sæta færi til að koma taug í skipið og gekk það brösuglega.

Ljósmynd/Landsbjörg

„Áhöfn Hannesar tókst þó að koma taug í skipið, en töldu rétt að halda för Jóhannesar áfram á staðinn, þar sem talsverð alda var í Garðskagaröstinni og einhverjar líkur taldar á að dráttartaugin gæti slitnað sökum þess að einungis var hægt að koma grennri taug í dráttarauga fiskibátsins,“ segir í tilkynningunni.

Jóhannes Briem var kominn á vettvang um tíuleytið í gærkvöldi og byrjaði á að kanna ástand dráttartaugar og tengingar hennar við fiskiskipið. Það leit vel út og því haldið áfram til hafnar í Njarðvík þar sem landa átti úr fiskiskipinu og taka það til viðgerðar. Jóhannes Briem fylgdi því skipunum til hafnar í Njarðvík. Þangað var komið rétt um miðnætti.

• Blogga um frétt