Kobbi Láka kom strandveiðibát til bjargar

Áhöfn björgunarbátsins Kobba Láka í Bolungarvík var kölluð út á tólfta tímanum í gærkvöldi vegna strandveiðibáts í vanda.

Drif bátsins hafði bilað rétt undan Bolungarvík og rak hann með ströndinni. Engin hætta var á ferðum fyrir þann eina sem var um borð, að því er segir í tilkynningu frá Slysavarnarfélaginu Landsbjörg, en aðstoð þurfi við að komast til hafnar.

Áhöfnin á Kobba Láka brást skjótt við og var björgunarbáturinn farinn úr höfn innan 10 mínútna frá beiðni um aðstoð. Tuttugu mínútum fyrir miðnætti var Kobbi Láka kominn að bátnum og um 10 mínútum síðar komu bátarnir í höfn í Bolungarvík.

• Blogga um frétt