Hljómsveitirnar Ateria og Ljósfari komust áfram á þriðja kvöldi Músíktilrauna í kvöld.
Vinkonurnar Ása Ólafsdóttir, Eir Ólafsdóttir og Fönn Fannardóttir skipa tríóið Ateria. Ása spilar á gítar og syngur, Eir Ólafsdóttir syngur líka og spilar á bassa og selló og Fönn Fannardóttir spilar á trommur. Þær hafa allar stundað tónlistarnám og tekið þátt í Stelpur rokka.
Ása og Eir eru systur og Fönn er frænka þeirra. Hljómsveitin var stofnuð haustið 2017 og æfir í bílskúr í Vesturbænum.
Hljómsveitin Ljósfari er hugarfóstur gítarleikarans Árna Svavars Johnsen og bassaleikarans Snorra Arnar Arnarsonar. Þeir fengu söngvarann Sigvalda Helga Gunnarsson til liðs við sig.
Fljótlega kom í ljós að meira vantaði inn í og þá kom til sögunnar hljómborðsleikarinn Benjamín Gísli Einarsson og loks trommuleikarinn Kristófer Nökkvi Sigurðsson. Þeir eru úr Reykjavík, á aldrinum 21 til 28 ára.