Þáttastjórnandinn Jimmy Kimmel átti erfitt með að fylgja handriti þáttarins Jimmy Kimmel Live í vikunni, sem sýndur er á sjónvarpsstöðinni ABC, þegar stórstjörnurnar Margot Robbie, Brad Pitt og Leonardo DiCaprio gengu yfir sviðið á leið á frumsýningu kvikmyndarinnar Once Upon a Time in Hollywood.
Um leið og Robbie gekk yfir sviðið stóðu áhorfendur upp og klöppuðu fyrir henni. „Afsakið, ég er bara að stytta mér leið.“
Kimmel var í annað skiptið stöðvaður með óvæntum fögnuðu áhorfenda þegar Pitt gengur þvert yfir sviðið á leið sinni á frumsýningu kvikmyndarinnar sem var í sömu götu, í kvikmyndahúsi beint á móti myndverinu þar sem þáttur Kimmel er tekinn upp í beinni dagskrá.
Þegar DiCaprio gengur yfir sviðið stoppar Kimmel og spyr hann: „Ert þú líka bara að stytta þér leið?“
„Nei í raun og veru ekki, ég er að bjóða áhorfendum að koma á frumsýningu kvikmyndarinnar. Bara ef þeir hafa áhuga,“ segir leikarinn og fær góðar undirtektir.
Það er áhugavert að sjá aðdáun almennings á frægum leikurum. Úr myndbroti þáttarins sem sýnt var m.a. á YouTube má sjá fögnuð áhorfenda sem kunnu vel að meta uppátækið sem þykir í anda leikstjórans Quentin Tarantino.