Hallur Már -
Menningarstofnanir víðsvegar um landið hafa þurft að laga sig að breyttum aðstæðum á síðustu vikum. Í Reykjanesbæ er metnaðarfullri tónleikadagskrá nú streymt heim í stofu til fólks í hverri viku. Í síðustu viku var það Ásgeir sem lék fyrir fólk en í kvöld eiga Moses Hightower sviðið.
„Þetta heppnaðist alveg gríðarlega vel. Það voru 2.500 manns sem horfðu á sama tíma á streymið. En yfir heildina þá voru um 24 þúsund manns sem komu inn,“ segir Þórdís Ósk Helgadóttir, forstöðumaður í Súlunni sem er eitt af menningarhúsunum í Reykjanesbæ. Á næstu vikum verður svo boðið upp á tónleika með GDRN og Hjálmum.
„Við vildum halda áfram að miðla menningu til fólks og þá kom upp þessi hugmynd hjá menningarstofnun bæjarins að fara í aðra tegund af miðlun,“ segir Þórdís en fleira en tónleikar er í boði hjá stofnunum bæjarins. Bókasafnið hefur til að mynda verið í mikilli streymisþjónustu þar sem verið er að kynna rafbækur, taka viðtöl við listfræðinga og fleira í þeim dúr. Síðasta föstudag var svo Popppunktur með Dr. Gunna í beinni útsendingu sem fólk gat tekið þátt í.
Í myndskeiðinu er rætt við Þórdísi og þá má sjá brot af tónleikum Ásgeirs frá því í síðustu viku.
Hægt er að streyma tónleikum Moses Hightower sem hefjast klukkan átta í kvöld í gegnum facebooksíðu Hljómahallar. Yfirlit yfir þá fjölmörgu viðburði sem eru í samkomubanninu í Reykjanesbæ má finna hér.
Við hjá Árvakri viljum vekja athygli á því sem vel er gert á þessum erfiðu tímum. Ef þú ert með góða sögu af fyrirtækjum og einstaklingum sem eru að gera gott, sendu okkur ábendingu á netfangið stondumsaman@mbl.is.