Þáttunum Bridgerton hefur verið streymt á yfir 63 milljónum heimila frá því að þeir komu út á jóladag. Þetta er fimmti besti árangur netflix-seríu á streymisveitunni frá upphafi. Bridgerton komust á topp 10-lista á Netflix í 76 löndum í heiminum. Variety greinir frá.
Þættirnir eru þeir fyrstu sem höfundurinn Shonda Rhimes kemur að eftir að hún gerði samning við streymisveituna. Rhimes var áður með samning við ABC-sjónvarpsstöðina og framleiddi þættina Grey's Anatomy, Scandal og How To Get Away With Murder.
Bridgerton-þættirnir hafa notið mikilla vinsælda um heim allan og fengið gríðarlega góðar umsagnir. Einkunn þáttanna á Rotten Tomatoes er til dæmis 92%, sem þykri ansi gott.
Þættirnir eru byggðir á fyrstu bókinni úr bókaseríunni Bridgerton eftir bandaríska rithöfundinn Juliu Quinn. Ekki hefur verið gefið út hvort fleiri seríur verði gerðar upp úr bókaröðinni en alls eru níu bækur í henni.