Allen neitar öllum ásökunum
Setja bókamerki
Leikstjórinn Woody Allen og eiginkona hans Soon-Yi Preven hafa sent frá sér tilkynningu þar sem þau neita öllum ásökunum sem koma fram í heimildaþáttunum Allen vs. Farrow. Fyrsti þáttur af fjórum var sýndur í gærkvöldi á sjónvarpsstöðinni HBO.
Í tilkynningunni til The Hollywood Reporter segja hjónin að heimildamyndagerðarmennirnir hafi ekki haft neinn áhuga á sannleikanum og saka þá um að hafa unnið náið með samverkamönnum fyrrverandi eiginkonu Allens, Miu Farrow.
Í heimildamyndinni er fjallað um Dylan Farrow, ættleidda dóttur Farrow og Allens. Þar segir hún frá því hvernig Allen misnotaði hana kynferðislega þegar hún var ung að aldri.
„Þessir heimildamyndagerðarmenn höfðu engan áhuga á sannleikanum. Í stað þess unnu þeir leynilega í mörg ár með Farrow-fjölskyldunni og þeirra samverkamönnum til að setja saman skelfilega útkomu sem er uppfull af blekkingum. Þeir nálguðust Woody og Soon-Yi fyrir innan við tveimur mánuðum og fengu þau aðeins nokkra daga til að bregðast við. Auðvitað neituðu þau því tilboði,“ segir í tilkynningunni.
Enn fremur er imprað á því að ásakanir Dylan séu ósannindi og að oft hafi verið sýnt fram á það. Allen hefur haldið því fram, allt frá því ásakanirnar komu fyrst upp á yfirborðið, að fyrrverandi eiginkona hans hafi heilaþvegið dóttur þeirra til að halda þessu fram.
Allen og Farrow hófu ástarsamband sitt árið 1980. Þau hættu saman árið 1992 eftir tólf ára samband þegar í ljós kom að Allen hafði verið að halda við ættleidda dóttur Farrow, Soon-Yi, sem þá var 21 árs. Allen og Soon-Yi giftu sig árið 1997.
Banna mengandi búnað sem leyfður er á Íslandi
Kostnaður meiri en milljón á fermetra
„Höfum ekki náð að skríða upp úr þeirri gryfju“
Tveir í bílnum sem lenti utan vegar
„Umsátursástand“
Skar höfuðleðrið af íslenskri konu
Hvorki sést áður hér á landi né annars staðar