Alríkisdómari hafnaði fyrr í kvöld beiðni Hunter Bidens, sonar Joe Bidens Bandaríkjaforseta, um að fá að sleppa því að mæta í eigin persónu í fyrirtöku 3. október.

Frétt af mbl.is

Hunter Biden ákærður

Lögfræðiteymi Hunter Bidens hafði reynt að fá það í gegn að Hunter yrði viðstaddur fyrirtökuna í gegnum fjarfundarbúnað og vísuðu þeir til „fjárhagslegra áhrifa“ sem það myndi hafa á stjórnvöld og skipulagóreiðuna sem yrði í miðbænum ef hann myndi mæta í persónu.

Lögmenn Hunter Bidens hafa þegar sent bréf á dómarann, Cristopher Burke, þess efnis að Hunter hyggist lýsa yfir sak­leysi sínu vegna meintra vopna­laga­brota. Er hon­um gefið að sök að hafa logið til um edrúmennsku sína þegar hann keypti byssu í októ­ber­mánuði árið 2018. 

Christopher Burke, sagði að sonur forsetans „ætti að fá sömu meðferð og allir aðrir sakborningar í réttarsalnum okkar“. Burke gaf Hunter Biden þó auka viku til að verða við kröfunni, en upphaflega átti hann að mæta 26. september.

Frétt af mbl.is

Biden lýsti yfir sakleysi sínu

Viðurlögin allt að 25 ára fangelsisvist

Sam­kvæmt vopna­laga­lög­gjöf í Delaware, þar sem dóm­stóll tek­ur mál Bidens fyr­ir, er óheim­ilt að bera byssu und­ir áhrif­um fíkni­efna sem og að sækja um heim­ild til byssu­kaupa á meðan neyslu­tíma­bili stend­ur. Viður­lög­in eru allt að 25 ára fang­elsi.

Biden hef­ur um ára­bil glímt við áfeng­is- og krakkfíkn. Er hann sagður hafa keypt sér byssu af gerðinni Colt um tveim­ur mánuðum eft­ir að hann kom úr einni af mörg­um meðferðarúr­ræðum sem hann hef­ur leitað til. 

Frétt af mbl.is

Forsetinn tengdur viðskiptum sonarins