Rúrik Gíslason, fótboltamaður, leikari og tónlistarmaður, er ansi eftirsóttur um þessar mundir og með ótal verkefni í bígerð. Íslenski landsliðsmaðurinn fyrrverandi er staddur í Amsterdam við tökur á nýrri kvikmynd og segir hann hlutverkið vera það stærsta hingað til. 

Rúrik greindi frá þessu á Instagram-síðu sinni í gær en hann var með svokallað Q & A þar sem hann gaf fylgjendum sínum tækifæri til þess að spyrja hann spjörunum úr. 

Einn forvitinn fylgjandi vildi ólmur fá frekari upplýsingar um kvikmyndaverkefnið og önnur framtíðarverkefni en Rúrik gat ekki veitt ítarlegar upplýsingar um það að svo stöddu.

Svar hans var heldur óljóst en Rúrik viðurkenndi að þetta væri fyrsta aðalhlutverkið hans á hvíta tjaldinu og kvaðst spenntur fyrir framhaldinu. 

Rúrik hefur tekið þátt í nokkrum kvikmynda- og sjónvarpsverkefnum, bæði hérlendis og erlendis. Hann fór meðal annars með hlutverk í íslensku gamanhasarmyndinni Leynilöggan og sjónvarpsþáttaröðinni IceGuys. Rúrik dansaði einnig til sigurs í þýsku útgáfunni af Let's Dance.