Lundúnalögregla birtir myndir af fjórum mönnum vegna sprenginganna í gær

Lögreglan í Lundúnum sýndi í dag myndir úr öryggismyndavélum af fjórum mönnum, sem hún segist nauðsynlega þurfa að yfirheyra vegna sprenginga í þremur járnbrautarvögnum og strætisvagni í borginni í gær.

Fram kom á blaðamannafundi, að lögreglan hefur í dag gert húsleit á þremur stöðum í Lundúnum. Þá sagði lögreglan, að sprengjuárásirnar í gær væru í ýmsum atriðum svipaðar og árásirnar, sem gerðar voru 7. júlí. Einnig kom fram að sprengjurnar hefðu verið heimatilbúnar.

Ian Blair, lögreglustjóri í Lundúnum, sagði á fundinum, að lögreglan stæði frammi fyrir áður óþekktri ógn og mikilli hættu. Hann lagði áherslu á að aðgerðir lögreglunnar beindust gegn glæpamönnum en ekki tilteknum samfélögum eða hluta af samfélagi.

Þá sagði Blair, að aðgerðirnar á Stockwell brautarstöðinni í morgun, þar sem lögregla skaut karlmann til bana, tengdist beint yfirstandandi aðgerðum gegn hryðjuverkastarfsemi. Lögregla hefði beint skipunum til mannsins en hann neitaði að hlýða.