Starfsmaður Oxford-háskóla og bandarískur háskólakennari sem grunaðir eru um að hafa myrt 26 ára gamlan Bandaríkjamann hafa gefið sig fram við lögreglu. Lýst var eftir þeim á dögunum, en á föstudag gáfu þeir sig fram friðsamlega eftir samningaviðræður við lögreglu.
Frétt mbl.is: Kennarar eftirlýstir fyrir morð
Andrew Warren, 56 ára gjaldkeri við Oxford-háskóla, gaf sig fram við lögregluna í San Francisco seint á föstudag, og Wyndham Lathem, 42 ára kennari í örverufræði við Northwestern-háskóla í Chicago, gaf sig fram við lögregluna í Oakland um svipað leyti. Þeir eru grunaðir um að hafa stungið Trenton Cornell-Duranleau ítrekað þann 27. júlí sl.
Lögreglan í Chicago fer með rannsókn málsins. Samkvæmt upplýsingum frá lögreglu voru uppi samningaviðræður við mennina um að gefa sig fram. „Báðir einstaklingar verða haldnir ábyrgir fyrir gjörðum sínum og við vonum að handtökurnar færi fjölskyldum hins látna ró,“ sagði í yfirlýsingu frá lögreglunni í Chicago eftir handtökuna.
Lögregla segir Lathem hafa sent myndband til fjölskyldu og vina þar sem hann baðst afsökunar á aðkomu sinni að morðinu. Sagði hann það „stærstu mistök lífs míns“. Í kjölfarið óttaðist lögregla að hann væri í sjálfsvígshugleiðingum. „Við erum þakklát fyrir að báðir menn voru færðir í hald lögreglu og málið endaði ekki í frekari hörmungum,“ sagði jafnframt í tilkynningunni.
Daginn sem morðið var framið keyrðu Warren og Lathem til Wisconsin þar sem annar þeirra lagði þúsund dollara inn á bókasafn í nafni Cornell-Duranleaus. „Ég hef aldrei séð mál þar sem einhver sem grunaður er um morð hefur lagt inn pening í nafni fórnarlambs síns,“ sagði talsmaður lögreglunnar.
Morðið átti sér stað í River North-hverfinu í Chicago. Upp komst um málið er einhver í móttöku fjölbýlishússins þar sem morðið var framið hringdi á lögregluna.
Lögreglan í Chicago hefur ekki gefið upp hvert tilefni árásarinnar var. Hún hefur hins vegar sagt að mennirnir tveir hafi sést á eftirlitsmyndavélum í að yfirgefa fjölbýlishúsið nóttina sem morðið var framið.