Mannskæðar aurskriður í vonskuveðri

Fellibylurinn Tembin olli flóðum og kostaði 240 manns lífið er ...
Fellibylurinn Tembin olli flóðum og kostaði 240 manns lífið er hann fór yfir Filippseyjar í desember. AFP

Fjórir hið minnsta hafa látið lífið á Filippseyjum í vonskuveðri sem nú geisar á sunnanverðum eyjunum. Hitabeltisstormur og  úrhellisrigning hafa valdið mannskæðum aurskriðum að sögn filippseysku lögreglunnar.

Nokkrar aurskriður féllu m.a. í nágrenni námabæjarins Carrascal og kostuðu þær fjóra lífið að sögn James Alendogao, lögreglustjóra í héraðinu.

„Ómögulegt er að komast á þessa staði eins og er, þannig að við vitum ekki umfang skaðans,“ sagði Alendogao í samtali við AFP-fréttastofuna.

Veðurstofa Filippseyja segir von á að stormurinn muni ganga norðvestur yfir eyjarnar næsta sólarhringinn.

Um 20 slíkir hitabeltisstormar og fellibylir fara yfir Filippseyjar árlega og er stormurinn nú, sem fengið hefur nafnið Sanba, annar sem fer yfir eyjarnar á þessu ári en sá fyrsti sem veldur manntjóni.

Hitabeltisstormurinn Tembin sem fór yfir Mindano-hérað Filippseyja í desember á síðasta ári kostaði hins vegar 240 manns lífið.

mbl.is