Öryggisráð Sameinuðu þjóðanna hefur frestað atkvæðagreiðslu um vopnahlé í Sýrlandi þar til klukkan 17 á laugardag. Ekki var komist að samkomulagi sem Rússar gátu sætt sig við.
Viðræður hafa staðið yfir frá 9. febrúar í Öryggisráðinu um ályktun um vopnahlé og á meðan hefur stjórnarher Sýrlands, með stuðningi Rússa, ráðist af hörku á austurhluta Ghouta-héraðs.
Yfir 460 manns, þar af 100 börn, hafa látist á þeim sex dögum sem Sýrlandsher hefur látið sprengjum rigna yfir þegna sína á svæðinu. Rússar, sem styðja og taka þátt í aðgerðum Sýrlandshers, hafa neitunarvald í öryggisráðinu.
„Við höfum ekki náð að loka þessu alveg,“ hefur fréttastofa AFP eftir Olof Skoog, sendiherra Svía. „Við munum vinna í kvöld og vonandi, við munum tvímælalaust koma aftur á morgun og við munum kjósa.“
Nikki Haley, sendiherra Bandaríkjanna, gagnrýnir Rússa á Twitter-síðu sinni fyrir að standa í vegi fyrir því að ráðið álykti um málið. „Ótrúlegt að Rússland tefji atkvæðagreiðslu um vopnahlé sem gefur færi á mannúðaraðstoð í Sýrlandi. Hversu margir í viðbót munu láta lífið áður en Öryggisráðið samþykkir að fara í þessa atkvæðagreiðslu? Gerum þetta í kvöld. Sýrlenska þjóðin getur ekki beðið.
Unbelievable that Russia is stalling a vote on a ceasefire allowing humanitarian access in Syria. How many more people will die before the The Security Council agrees to take up this vote? Let’s do this tonight. The Syrian people can’t wait.
— Nikki Haley (@nikkihaley) February 23, 2018